nenehcherry

[Greinin var skrifuð fyrir Morgunblaðið og birtist þar, laugardaginn 15. mars, 2014]

Hrá… eins og sushi

• Neneh Cherry snýr aftur á sjónarsviðið
• Litskrúðugur ferill; varðaður pönki, poppi og taugaáföllum

Ég varð fyrst var við Neneh Cherry er lagið „Buffalo Stance“ glumdi látlaust í viðtækjum sumarið 1989. Ég var fimmtán ára, í draumavinnunni (lagermaður hjá Steinari í Kópavogi) og allra handa neðanjarðartónlist var tekin að heilla. Cherry var því „bara“ popp og ég pældi lítið í henni, fannst lagið þó ágætt en ekki mikið meira en það (og hefði aldrei viðurkennt slíkt á þessu ofurviðkvæma þroskaskeiði). Það var ekki fyrr en löngu síðar að ég komst að því að hún hafði spilað sæmilega rullu í síðpönkssenunni í London í upphafi níunda áratugarins og væri fósturdóttir djassrisans Dons Cherrys. Ég varð svo heldur betur var við hana í hitteðfyrra, er platan The Cherry Thing kom út, samstarf hennar við jaðardjassarana sænsku í The Thing og nú, í síðasta mánuði, kom platan Blank Project út, fyrsta sólóplata Cherry í 18 ár.

Hluturinn

En áður en við veltum fyrir okkur tildrögum hennar skulum við kíkja lítið eitt á litskrúðugan tónlistarferill Cherry. Hún fæddist árið 1964 í Stokkhólmi, dóttir Monicu „Moki“ Cherry og trymbilsins Amahdu Jah frá Síerra Leóne. Monica giftist síðar Don Cherry og gekk hann Neneh í föðurstað. Hún ólst upp í sænsku sveitinni og var húsið undirlagt af allra handa sköpunargleði og var gestkvæmt mjög að því leytinu til. Þetta uppeldi átti eftir að móta Cherry fyrir lífstíð.
Fjölskyldan bjó um hríð í New York en sem unglingur flutti Cherry til London og tók þátt í síðpönkssenunni þar. Hún bjó t.a.m. með Ari Up úr Slits, söng með Rip Rig + Panic og spilaði hipp-hopp sem plötusnúður. Það var því harla óvænt er hún sló í gegn sem poppsöngkona með fyrstu breiðskífu sinni, Raw like Sushi (1989). Illa gekk þó að fylgja frægðinni eftir, samstarf hennar og Youssous N’Dours í laginu „7 Seconds“ vakti þó mikla athygli árið 1994 og lagið fékk mikla spilun á öldum ljósvakans. Cherry hefur því verið utan alfaraleiðar lengi vel en árið 2011 fékk hún hljómgrunn á jaðrinum, þar sem hún fann upprunalega sína rödd. The Cherry Thing, sem er unnin með The Thing (Mats Gustafsson er m.a. í sveitinni), er hávaðasöm, tilraunakennd skífa og eru verk fósturföður hennar, Dons, m.a. til grundvallar. Plötunni var vel tekið og veitti Cherry innblástur til frekari verka.

Frosin

The Blank Project var samið af Cherry og eiginmanni hennar, Cameron McVey. Upptökur fóru fram í Woodstock en upptökustjórnandinn, Kieran Hebden (Four Tet), býr þar hluta úr ári. Gestir eru m.a. sænska poppstjarnan Robyn og slagverksdúettinn RocketNumberNine. Tónlistin og textarnir eru nokkurs konar hugleiðing um móður Cherry, sem lést 2009. Cherry varð fyrir miklu áfalli við þann atburð og lagðist í mikið þunglyndi í kjölfarið. Stóð það yfir í meira en ár, þar sem hún var meira og minna „frosin“ að eigin sögn.
Upptökur á The Blank Project stóðu í fimm daga og var tveimur lögum rúllað inn á harða diskinn á dag. Hugmyndin var að hafa framvinduna hráa og „lifandi“ en tökur urðu aldrei fleiri en þrjár. Að fanga „andann“ var aðalmálið. Návist Hebdens er þá greinileg, maður finnur á fyrstu sekúndunum að þessi maður hafði tilsjón með framvindunni, svo einkennandi er stíll hans. Platan er ágeng og hörð, dálítið myrk, og hvellt slagverkið hringar öll lög. Miðlæg er svo Cherry, sem er auðheyranlega að hella úr hjartanu, eða eins og hún segir í viðtali við Pitchfork: „Með fyrri verk mín, þá finnst mér, þegar ég lít til baka, eins og ég sé ekki alveg á staðnum. Ég er hins vegar algerlega heil með þessum lögum. Ég hafði djúpa, knýjandi þörf fyrir að gera þessa plötu en ég var um leið undarlega róleg og æðrulaus í gegnum allt ferlið.“

Tagged with: