Greinin var skrifuð fyrir Morgunblaðið og birtist þar, laugardaginn 21. júlí, 2018


Dansinn dunar

Rok í Reykjavík er ný plata með Salsakommúnunni, innihaldið lög undir ríkum áhrifum frá suðrænni sveiflu eins og nafnið gefur til kynna

Tónlist ferðast, það hefur hún alltaf gert, en á örari og auðveldari hátt nú en áður fyrr. Frá örófi alda hafa straumar og stefnur ferðast milli Atlantsála og heilu heimsálfanna, tekið sér bólfestu í hafnarbæjum og útnárum og lúrt þar, lengi lengi, og erfitt að rýna í nákvæmlega hvaðan þetta kom og hvers vegna. Í dag er þetta hins vegar allt fremur auðrekjanlegt, á tímum ofurupplýsinga og stafrænna fótspora. Salsatónlistin, hér í meðförum Íslendinga, er reyndar sjálf dæmi um þetta, er samsláttur tónlistarbrota sem koma víðsvegar vegar að. Stefnan varð reyndar til norður í New York á sjöunda áratugnum, fyrir tilstilli aðfluttra Kúbverja og Púertó Ríkó-búa, og blandast þar saman kúbverskt „son“ (sem er hristingur hins spænska canción og afrískrar ásláttalistar), „latín“-djass og fleiri stefnur sem væri ógjörningur að telja upp í ekki lengri grein. Salsa dreifðist síðan um báðar Ameríkurnar – og um heim allan á endanum.

Þrátt fyrir nafnið skilgreinir Salsakommúnan sig breitt, tekur í raun inn alls kyns stefnur frá Rómönsku Ameríku. Kommúnan er skipuð ungu tónlistarfólki, vinum og félögum úr tónlistarskólum m.a. og hefur nú verið starfandi í tæp tvö ár (og fetar í fótspor samlanda eins og Bubba, Tómasar R., Samúels J. Samúelssonar, Egils Ólafssonar og Milljónamæringana svo fáeinir séu nefndir sem hafa látið sig þennan víða geira varða). Rok í Reykjavík heitir fyrsta breiðskífa hennar og innihaldið níu frumsamin lög eftir meðlimi, öll í þessum rómanska stíl. Um leið eru textasmíðarnar undir áhrifum töfraraunsæisins sem einkennir bókmenntir Suður-Ameríku og er því hrært saman við grámóskulegan, skandinavískan veruleika og þessum tveimur ólíku menningarheimum þannig att saman. Það er á vissan hátt kímilegt þegar fólk í norðangarra reynir sig við sólbakaða takta en útkoman er oftast forvitnileg – og á stundum stórskemmtileg (sjá t.d. Hjálma). Geislaplatan sjálf er þá hin vandaðasta hvað hönnun varðar og meðlimir skilja það greinilega gjörla að smáatriðin skipta öllu máli. Litir og teikningar undirstrika þar súrrealískt textaþemað og á útgáfutónleikum var t.d. boðið upp á kennslu í salsadansi. Auk þess fengu 60 fyrstu kaupendur plötunnar sérstaka Salsakommúnu-salsasósu, framleidda af Ó. Johnson & Kaaber. Snilld!

Platan var tekin upp af Kommúnumeðliminum Baldvini Snæ Hlynssyni og Kjartani Kjartanssyni og fóru upptökur fram í Hljóðrita að mestu leyti, og tóku tvo daga. Platan fæst í Eymundsson, Smekkleysu, 12 tónum og Lucky Records, er einnig á Spotify og svo er sveitin með fínustu viðvist á Fésbókinni þar sem hægt er að nálgast frekari upplýsingar.

 

 

Tagged with:
 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Set your Twitter account name in your settings to use the TwitterBar Section.
Follow

Get every new post on this blog delivered to your Inbox.

Join other followers: