Rýnt í: Guðmund Ara Arnalds

Follow

Greinin var skrifuð fyrir Morgunblaðið og birtist þar, laugardaginn 9. mars.

Ólmast í útjaðrinum

Guðmundur Ari Arnalds kallar ekki allt ömmu sína þegar kemur að afköstum í íslenskri neðanjarðartónlist. Pistilritari ræddi við Guðmund um bráðkomandi útgáfur og starfa hans almennt.

Ég renni við á Loft hostel í Bankastræti hvar Guðmundur situr með fartölvuna sína í rólyndishorni, sinnandi dagsins amstri. Við erum hátt uppi, bæði landfræðilega og andlega, enda er sólin farin að skína af nokkrum krafti. Marsupphaf, það glittir í vorið og gott betur og kaffið okkar ilmar bæði af sætum keim og súrum, ekki ósvipað tónlistarframleiðslu viðtalsefnisins.

Ég og Guðmundur höfðum verið í sambandi vegna nokkurs fjölda útgáfna sem hann stendur að um þessar mundir. Raðast þær nánast allar á upphaf þessa árs og því þótti okkur skynsamlegt að taka þær inn í einni kippu. „Ég gaf ekkert út í fyrra, kíkti svo í skúffurnar um daginn og þær voru fleytifullar af efni,“ lýsir Guðmundur.

Okkar maður er þræltengdur í það sem við skulum kalla neðanjarðartónlistarsenu landsins og vinnur m.a. í Mengi, vöggu þess geira. Hann er þá með sterk tengsl inn í listasamlagið post-dreifingu og hefur verið að gefa út tónlist, ýmist einn eða í samstarfi við aðra. Guðmundur og fyrrverandi samstarfskona hans í Mengi, Ragnheiður Elísabet, standa þá að Agalma merkinu/kvöldunum sem hefur skilað 27 plötum af spunatónleikum/tónverkum síðastliðin fimm ár. Það sem er fram undan er svo þetta. Í janúar kom út platan Beyond Happy með sveitinni glupsk sem hann skipar ásamt Örlygi Steinari Arnalds og Vilhjálmi Yngva Hjálmarssyni. Sú plata er samvinnuverkefni þeirra og Sigtryggs Bergs Sigmarssonar og er útgefandi hið öfluga ítalska merki Superpang. Þá kom út í febrúar plata með dúettinum Pellegrina (Guðmundur og Juan Melero úr Xiupill), Another Accident, byggð á tónleikasetti. Einnig er komin út drunuplata („drone“) undir hans eigin nafni. Kallast hún Nautnir þrjár og er það Mengi sem gefur út. Hann og Sara Flindt (ZAAR) eru að vinna saman að plötu og stefnt er á að klára hana fyrir vorið og teknóplata er líka væntanleg, stafræn útgáfa í apríl og vínyll eitthvað seinna, en þar notast hann við nafnið Slummi. Ný útgáfa, LÍM, gefur út og hún tengist og inn í netútvarpið Drif hvar mikið líf og fjör er að finna (sjá Youtube). Stefnt er á aðra plötu með Slumma fljótlega í kjölfarið og yrði hún með öðrum vinkli en fyrsta platan. Nóg að gera sem sagt!

Guðmundur segir að honum finnist gott að vera með marga bolta á lofti. Hann er í mastersnámi í mannfræði meðfram öllu upptöldu en segir að tónlistariðkunin sé nauðsynleg. „Ég get ekki verið bara með hausinn í Mengi eða bara í náminu,“ lýsir hann stóískt. „Frekar en að glápa á sjónvarpið fer ég í þetta.“ Hann tiltekur meistara Jim O‘Rourke sérstaklega í framhaldinu, hvernig O‘Rourke sé að leysa sig upp smátt og smátt sem „tónlistarmann“ og sé fremur að sinna hinum og þessum verkefnum. Guðmundur segir neðanjarðarsenuna hérlendis byggjast mikið til á samvinnuverkefnum og sveitir og verkefni spretti oft upp úr því þegar fólk ferðist saman eða haldi tónleika saman. Það flæði gefi svo af sér plötur og svo bíti þetta allt saman í skottið á sér.

Verkefni Guðmundar eru fleiri en þau sem hafa verið tiltekin hér og vann hann t.d. með ex.girls að lofaðri plötu hennar. Áhugasamir geta svo kannað þetta í kjölinn á gummiarnalds.online.

Follow