Follow
Greinin var skrifuð fyrir Morgunblaðið og birtist þar, þriðjudaginn 8. apríl.
Úr dýpstu iðrum
AF MÚSÍKTILRAUNUM
Það er andvarpað í hljóðnema. Röddin titrar af … óþoli, spennu … hræðslu? Blanda af þörf til að tjá eitthvað um leið og röddin ber það með sér að sá sem hana á er magnþrota. Og lagið er ekki byrjað. Það er eitthvað heillandi við þetta. Röddina á Þórhildur Helga Pálsdóttir söngkona Geðbrigða. Og á næstu tíu mínútum gerist eitthvað sem hefur aldrei sést á sviði í Músíktilraunum. Þórhildur gefur sig bókstaflega alla, félagar hennar fylgja henni af ástríðu sömuleiðis og hrátt pönkrokk sveitarinnar – sem særir fram anda PJ Harvey, Bikini Kill, Slits og Birthday Party – leggur einfaldlega salinn. Ég fékk gæsahúð, hnút í magann og komst í andnauð. Ég er enn að jafna mig á þessu. Og fyrsta sæti Músíktilrauna 2025 var þeirra. Eðlilega.
Spriklandi raftónlist
Kvöldið, úrslitakvöld Músíktilrauna þetta árið, hófst annars með dulúðugu, nett progguðu rokki Spiritual Reflections. Maður hugsar um sveitir eins og Nightwish, Evanesence jafnvel. Anna Fanney söngkona er flott í stafni. Epík Opeth á sveimi og goth-straumar leikandi um. Framfærsla öll á þessu er þó enn fokheld eins og er og óþéttleiki gerði vart við sig. Lögin þá skringilega samsett og lopinn oft fullteygður. Það er hins vegar metnaður í sveitinni og ýmislegt hægt ef haldið er á spöðum næstu misseri.
Splitting Tongues var skemmtileg í undanúrslitunum, hressandi og keyrsluríkt grændkor. Þriðja lagið, en nú fluttu sveitir og listafólk þrjú lög en ekki tvö, var óeftirtektarvert og sett þeirra félaga féll dálítið flatt verður að segjast.
LucasJoshua er efnilegur raftónlistarmaður og stóð sig með sóma, rétt eins og á undankvöldinu. Tónlistin hans er fremur óræð, „spriklandi raftónlist“ punktaði ég hjá mér. Skemmtileg, litrík og fjörug, vaðið úr einu í annað, oftast til heilla en um leið er eitt og annað sem má alveg tálga til.
Óslípaður demantur
Þeir komu öruggir til leiks, j. bear & the cubs, með sitt stuðvæna, vel samda þjóðlagapopp. Konseptið er á hreinu, ára góð leikur um félagana og eiginlega ómótstæðilegur sjarmi í gangi, sérstaklega fyrir tilstilli leiðtogans, Jaspers Matthews Bunch.
Þögn lék þrjú lög að hætti hússins og María Fönn söngkona er forvígiskona af Guðs náð. Sveitin var meira sannfærandi en á undankvöldinu, tætti í gegnum lögin af öryggi.
Big Band Eyþórs gerði og sitt með glans líkt og síðast, stórsveitarstemningin alvöru, grúvið gott og söngur sömuleiðis. Ellefu manns á sviði, þverflautuleikari kominn um borð og brassið á fullu stími.
Popprokk Asbezt er í mótun, sveitin er ung og samhæfingu enn nokkuð ábótavant. Það er hins vegar mikil ástríða í bandinu, sérstaklega í þeim Urði Óliversdóttur og Elínu Margréti Guðmundsdóttur. Óslípaður demantur eins og stundum er sagt.
Dularfull og svöl
Elín Óseyri vakti verðskuldaða athygli á undankvöldinu, sviðsframkoma upp á tíu og þrátt fyrir ungan aldur eitthvað svo langt komin samt. Sú staðreynd að hún flutti þrjú lög afhjúpaði eilítinn veikleika, þann að lögin hennar eru fulleintóna eins og er. Ég er hins vegar mikill aðdáandi texta hennar sem fjalla um fláráðar ástir, löngun, þrár og breyskleika elskandi manneskja. Berskjaldandi mjög og hugdjarft.
Rown frá Laugum mætti ákveðin til leiks og hálf sveitin í salnum, virtist vera. Epískt þungapoppið glumdi, og svei mér þá, áhrif frá aldamótapoppi Írafárs merkjanleg. Trymbillinn átti góða spretti en melódramatískir sviðsstælar restarinnar eru nokkuð sem mætti hugsa um. Ríkey Perla söngkona var hins vegar svöl. Dularfull og svöl.
Ótrúleg frammistaða
Geðbrigði luku svo kvöldi með hreint út sagt ótrúlegri frammistöðu eins og ég lýsi hér að framan. Söngur Þórhildar rífur upp allan sársauka kvenna fyrr og nú og eimar hann niður í öskur sem tætir í manni taugarnar. Þið, sem finnst ég vera að ýkja, hefðuð bara þurft að vera þarna. Og að sjá þau öll, svona einbeitt og ákveðin, snerti mann djúpt. Hér er sveit sem vert er að fylgjast með á næstunni.
Geðbrigði hömpuðu síðan fyrsta sætinu eins og fram kemur í upphafi. Í öðru sæti hafnaði j. bear and the cubs og Big Band Eyþórs landaði því þriðja. Hljómsveit fólksins var valin Rown. Einstaklingsverðlaun voru þessi: Söngur: Þórhildur Helga Pálsdóttir í Geðbrigðum. Bassi: Aliza Kato í Nógu gott og Kyrsa. Hljómborð/píanó: Eyþór Alexander Hallsson úr Big Bandi Eyþórs. Gítar: Ísleifur Jónsson í Sót. Trommur: Þorsteinn Jónsson úr Big Bandi Eyþórs. Rafheili: Lucas Joshua Snædal Garrison (LucasJoshua). Höfundaverðlaun FTT fóru til j. bear & the cubs og verðlaun fyrir íslenska texta féllu Geðbrigðum í skaut.
Deildu!
