plow

Dansk/íslenska sveitin Plöw leikur nokkurs konar drullurokk. Orðið er þó langt í frá áhrínsorð, þetta meira tilraun til þýðingar. Plöw, sem er dönsk/íslensk sveit, leikur þannig blöndu af  „sludge“ og „stoner“-rokki sem er að forminu til dásamlega skítugt og „slímugt“, líkt og hljómunum sé velt áfram í mykju og drullu. Einhvern veginn þannig er a.m.k. upplifunin af vel útfærðri tónlist af því taginu.

Það fréttist oft lítið og illa af hljómsveitum sem eru skipaðar að hluta eða í heild Íslendingum sem búsettir eru erlendis. Menn virðast þurfa að búa og starfa á Íslandi eigi leiðin að vera greið í fjölmiðla þar. Það var því ánægjulegt er James Einar Becker (áður í Dust Cap, El Rodeo) sendi mér póst með fréttum af téðri sveit Plöw en hann leikur þar á gítar.

Sveitin hefur verið starfrækt síðan 2009 og hefur nú gefið út tvær stuttskífur og breiðskífu sem kom út í fyrra, No Highness Below The Crown. Plöw hafa verið sérlega iðnir við tónleikakolann og spila reglubundið í Danmörku og víðar um Evrópu reyndar. Sveitin er orðin býsna vel tengd, með útgáfusamning við Mighty Music og dreifingarsamning við Target og útlitið því giska bjart í þeim efnum.

Þar hafið þið það og ég hvet ykkur til að kynna ykkur málin með aðstoð eftirfarandi hlekkja:

 

Tagged with: