Follow
Greinin var skrifuð fyrir Morgunblaðið og birtist þar, laugardaginn 7. nóvember, 2015
Líknandi reiði
Destrier er önnur breiðskífa Agent Fresco. Hljómsveitina skipa söngvarinn Arnór Dan Arnarson, trommuleikarinn Hrafnkell Örn Guðjónsson, bassaleikarinn Vignir Rafn Hilmarsson og gítar- og píanóleikarinn Þórarinn Guðnason.
Destrier er önnur breiðskífa Agent Fresco. Hljómsveitina skipa söngvarinn Arnór Dan Arnarson, trommuleikarinn Hrafnkell Örn Guðjónsson, bassaleikarinn Vignir Rafn Hilmarsson og gítar- og píanóleikarinn Þórarinn Guðnason. Tónlistina semja Arnór og Þórarinn að mestu en Hrafnkell og Vignir koma og að þeim málum. Texta á Arnór. Sveitin og Styrmir Hauksson stýrðu upptökum. Record Records gefur út.
Agent Fresco var afskaplega vel mótuð sveit er hún sigraði Músíktilraunir fyrir sjö árum. Vissulega ekki orðin að því öndvegisbandi sem hún er í dag, en það var ansi margt til staðar. Frábær hljóðfæraleikur, þéttleiki og góður andi stýrði för en mikilvægast var þó að sjá að meðlimir voru uppfullir af hugmyndum og gríðarlegri ástríðu í garð tónlistarsköpunar. Þetta sýndi sig síðan rækilega á fyrstu plötu sveitarinnar, A Long Time Listening (2010). Nú, fimm árum síðar, fara þeir félagar með hlutina upp á næsta stig. Áfram er unnið í sama hljóðheimi, svona nokkurn veginn, en þetta verk er dýpra, dekkra og þroskaðra en frumburðurinn.
Ég man ekki í svipinn eftir plötu sem hefur tekið sér jafn langan tíma í að breiða úr sér, vakna og draga mann inn. Sem er iðulega gott tákn. Destrier er ekki gefins, töfrar hennar koma í ljós smám saman, með endurtekinni hlustun fattar þú meira og meira. En einmitt vegna þessa ertu efins á tímabili, þér líst eiginlega ekkert á þetta. Þetta er of hægt, ekki nógu melódískt o.s.frv. Ekki nógu kraftmikið hugsaði ég lengi en nú, á síðustu metrunum í þessu dómahlustunarferli, hefur leyndardómurinn lokist upp fyrir mér. Platan er hugsuð sem hægstreymt ferli og það er ýjað að hlutum frekar en þeim sé slengt framan í þig. Destrier er hægelduð, hún kemur ekki úr örbylgjuofni.
Heildarhugmynd stýrir málum en í gegnum textana vinnur Arnór söngvari úr tilfinningum eins og reiði, ótta og kvíða sem spruttu upp í kjölfar líkamsárásar sem hann varð fyrir árið 2012. Þetta er því ekkert venjuleg plata, tónlistin hefur ákveðinn tilgang, er einskonar græðandi ferli þar sem Arnór kemur út á hinum endanum aðeins reynslumeiri, hreinni og vitrari. Platan opnar með löngum tón eður suði en svo brestur á með laginu „Dark Water“, svakalegt lag þar sem öllum helstu kostum Fresco er teflt fram. Tæknilegur og drífandi trommuleikur fylgir hugvitssamlegum, áleitnum gítarriffum og lagið er brotið upp með flottri „brú“ eins og það er kallað. Lagið er melódískt, epískt og surgandi og allt þetta á innan við fjórum mínútum! Píanóspil styður vel við framvinduna en yfir öllu er geðrík falsetta hins frábæra söngvara Arnórs. Á „Pyre“ róast leikar niður, svo er allt keyrt upp í stuttu titillaginu (sem er brotið upp með kraftmiklum óhljóðum). Platan rúllar mjög heildstætt en samt er merkilegt hversu fjölbreytt sveitin er innan hins gefna ramma. „Wait for Me“ vísar nánast í skuggum bundið R og B Weeknd á meðan „See Hell“ er hálfgert sinfónískt þungarokk. Og allt er þetta dásamlegt. Undir lokin togast á ljós og myrkur, reiðin er alger í „Angst“ á meðan „Death Rattle“ er nánast eins og sálmur, minnir á ægifallegar stemmur Talk Talk eða lokalögin á jarðarfararlegri lokaplötu Joy Division, Closer.
Fáar sveitir ná upp jafn andríkri stemningu á tónleikum og Agent Fresco – þéttara band er vandfundið þar sem meðlimir leika sem einn maður. En hljóðversútgáfan af Agent Fresco er alls ekki síðri, þann þátt eru meðlimir einnig með á tandurhreinu. Glæsilegt og hugrakkt verk frá einni bestu nústarfandi rokksveit Íslands.
Deildu!
