Follow
Greinin var skrifuð fyrir Morgunblaðið og birtist þar, laugardaginn 4. mars, 2017
„Lífsgleðin sjálf í brjósti þér…“
Hér verður seinni skammtur þeirra laga sem keppa um sæti í Söngvakeppni evrópskra sjónvarpsstöðva settur undir mælikerið.
Það er nú svo merkilegt að spádómar mínir sem ég setti upp fyrir viku rættust engan veginn! Öll þau lög sem ég var með einhvern barlóm yfir fóru áfram en þau sem ég taldi örugg, horfandi til míns djúpa og svo til óskeikula poppinnsæis, komust hvorki lönd né strönd. Skemmtileg birtingarmynd á því hvernig poppheimar virka, þar sem í enda dags er svo gott sem ómögulegt að geta sér til um hvað muni ná vinsældum og hvað ekki. Tónlistin er göldrum gædd og hlær að fimbulhætti okkar mannanna að þessu leytinu til. En hér eru semsagt lögin sex sem eftir eru. Og nú er ég alveg handviss um að þetta sé allt rétt hjá mér!
Ástfangin
Lag: Linda Hartmanns
Texti: Linda Hartmanns og Erla Bolladóttir
Flytjandi: Linda Hartmanns
Þung undiralda stýrir laginu og því tekst að vera gamaldags (formið) og nútímalegt (tölvutrommur) á sama tíma. Linda setur sig í Dion/Carey-legar stellingar og hleður í kraftballöðulegan söng og gerir það ágætlega. Lagið rennur línulega upp á við og springur upp í lokin. Þetta er samt mikil furðusmíð, eins og einn langur inngangur, og endirinn er úti á túni, líkt og klippt sé á hann. Brúin eða „millistefið“ undir restina hefði þurft að kom mun fyrr inn. Ég er ekki sannfærður.
Hvað með það?
Lag og texti: Daði Freyr Pétursson
Flytjandi: Daði Freyr Pétursson
Nútímalegt tölvupopp, söngurinn fjarlægur og kuldalegur og þannig afar „hipp og kúl“. Manni verður hugsað til Finnans Jaakko Eino Kalevi og Perfume Genius; stálkalt og svalt rafpopp en samt tilfinningaþrungið. Eðlilega syndir Daði ekki um jafn sýrulegin mið og þeir félagar, hipsterapoppið er vandlega „Evróvisjónað“ og mér finnst smíðin ganga vel upp. Látlaust, vinalegt og svona lúmskt grípandi. En er þetta of jaðarbundið fyrir Söngvakeppnina? Það kemur í ljós í kvöld.
Ég veit það
Lag: Einar Egilsson, Svala Björgvinsdóttir, Lester Mendez og Lily Elise
Texti: Stefán Hilmarsson
Flytjandi: Svala Björgvinsdóttir
Þetta er gott. Nútímalegt og svalt en býr yfir nákvæmlega rétta skammtinum af þeim Evróvisjón-blæ sem þarf. Viðlagið er knýjandi og grípandi, ástríðufullt út í gegn og Svala stendur glæst í stafni með örugga stjórn á framvindunni. Lykillinn hér er jafnvægi í öllum þáttum. Nógu svalt, nógu poppað, nógu söngvakeppnislegt, nógu þungt, nógu létt. Viðlagið, þessi kafli („Sumir dagar eru OK, aðrir dimmgráir, en hey!) og stutta rappið – þetta er allt stórglæsilegt. Þetta flýgur inn og alla leið, segi og skrifa það.
Þú og ég
Lag og texti: Mark Brink
Flytjendur: Páll Rósinkranz og Kristina Bærendsen
Hér er ekki að finna tölvupopp, nýjabrum né svalheit og ekkert að því. Lagið er einföld ballaða í kántrístíl, lætur lítið yfir sér þannig séð, snyrtileg og fumlaus. Stálgítar undirstingur kántríblæinn og lagið minnir sterklega á allar þessar ballöður sem streyma frá Nashville. En kannski vegna uppruna höfundar og söngvara er það alíslenskt á sama tíma, eitt af þessum huggulegu, vinalegu lögum sem maður heyrði í útvarpinu í gamla daga. Páll og Kristina syngja þetta af fagmennsku. Lítið út á þetta að setja þannig séð. Hvort það fer áfram eður ei veltur eiginlega á aldurssamsetningu kjósendanna!
Treystu á mig
Lag: Iðunn Ásgeirsdóttir
Texti: Ragnheiður Bjarnadóttir
Flytjandi: Sólveig Ásgeirsdóttir
Ljúft og létt eins og svo mikið af efninu þetta árið. Maður er hálfpartinn farinn að sakna jogginggallanna, gulu hanskanna og olíutunnanna. Byrjar með kunnuglegri hægð en svo er gefið lítið eitt í; gítarsláttur og fiðla. Lagið er stutt og sakleysislegt en óþægilega meinlaust eitthvað og einkennalaust. Viðlagið býr yfir sæmilegasta gáska reyndar en það er um það bil það eina sem ég get nefnt því til framdráttar. Sólveig gerir vel með takmarkaðan efnivið.
Þú hefur dáleitt mig
Lag: Þórunn Erna Clausen, Michael James Down og Aron Brink
Texti: Þórunn Erna Clausen og William Taylor
Flytjandi: Aron Brink
Nei, Walt Disney, komdu blessaður og sæll! Orkuríkur gleðismellur sem kallar óneitanlega fram „gengur vel“ senu úr Disney-teiknimynd. Framvindan er pottþétt, lagið er vel samið og allt í góðu samræmi, undirspil í takt við andann og Aron er punkturinn yfir i-ið, rödd hans hæfir laginu fullkomlega og hann ljær því sjarmann sem þarf til. Tær gleði – lagið er eins og vítamínsprauta – og það á möguleika á að fara langt á þessum hreinleika.
Deildu!
