ggggggggggggggggggggggggggggggggggggg

Skrifunum sem á eftir fara var hent inn á Snjáldru við loks hvers Airwavesdags. Ég lá venjulega í rúminu í kringum miðnættið, skrifaði þetta á símann minn, og hlóð líka myndum upp sem ég hafði tekið. Fleiri myndir má sjá á www.facebook.com/arnareggert  

Iceland Airwaves 2015 – Miðvikudagur

Frábært að vera kominn aftur á Airwaves eftir 3ja ára hlé. Ég og Matt Brennan, poppfræðidoktor og kær vinur, tókum þetta út og fyrst sáum við Heklu í Tjarnarbíó, flott og draugalegt – smá Twin Peaks stemning. Fórum þá á Sturlu Atlas á Húrra, geðveik stemning og Drake-legt táningsangistarrappið alveg að gera sig. Drengurinn/drengirnir er stjarna. Börn, þvílíkt snilldarband, spilaði svo í Gamla bíó. Ég dýrka gítarinn sérstaklega. Reykjavíkurdætur voru með helmagnaða uppákomu á Nasa og Misþyrming rokkaði af okkur sokkana á Gauknum. Enduðum svo með Teiti í Iðnó, mikið sem ég er hrifinn af þeim dreng, en við félagarnir hittumst í fyrsta skipti í kvöld. Valinn maður í hverju rúmi í sveit hans og tónlistin eitthvað svo indæl. Falsleysið hittir beint í mark; værukærðin, nýhippisminn, allt eitthvað svo rétt. Get ekki lýst því betur.

Iceland Airwaves 2015 – Fimmtudagur

Minna um hlaup út um allt og meira dvalið á sömu stöðum. Hófum leika í Fríkirkjunni, hvar Kristín Anna (stundum kennd við múm) lék sóló á píanó og söng. Stórkostlegt stöff. Ég er búinn að bíða í mörg ár eftir því að hún geri eitthvað við þessa tónlist sína, komi henni almennilega á framfæri og nú er farið að hylla undir slíkt, plata komin og önnur á leiðinni. Mirel Wagner lék svo á sama stað en ég var ekki alveg að dansa með e-a hluta vegna. Sá svo EKKI GusGus, einfaldlega af því að það var ekki smuga, KEX alveg helstappað og útúrhipsterað en ég heyrði óminn og hann var góður. Big-bandið hans Samma grúvaði feitt í Hörpu og vinur minn, Dr. Matt Brennan, poppdoktorinn, hann var að dansa og það bókstaflega. Lauk miklu lofsorði á Samma og co. Minn kæri bróðir keyrði svo allt í botn ásamt Einari Erni og ég veit að ég er ekki hlutlaus en svei mér þá, Ghostigital verða betri með hverju ári. Þetta var miskunnarlaust. Andlegir bræður þeirra, hin magnaða Pop Group, kom svo í kjölfarið og marxískt fönk þeirra var algerlega að gera sig. Grjóthart helvíti.

Iceland Airwaves 2015 – Föstudagur

Langur dagur! Vaknað fyrir allar aldir til að leggja lokahönd á erindi fyrir Útónráðstefnuna á Petersen, sem fjallaði um íslenska tónlist sem er ekki á radar hins hefðbundna Airwaves gests. Fórum svo í morgunmat í Hörpu í boði Önnu Hildar og svo var það erindið. Björk Guðmundsdóttir hitaði upp fyrir fyrirlesturinn þar sem allt sem úrskeiðis gat farið gerði nákvæmlega það. Tóndæmi voru spiluð af síma með hjálp 4G og einhvern veginn blessaðistþetta og vel það, alltént var mikið spurt og kát andlit í sal. Brunaði svo í útvarp (þetta var farið að verða ansi Ómars Ragnarslegt) og ræddi við Popplendinga um Airwaves, Springsteen, plötu vikunnar og sitthvað fleira. Greip svo Jófríði (Samaris, Pascal Pinon o.fl.) sem var að spila í Alda hotel. Hún á eftir að ná langt, er alveg með þetta. Sindrandi gítar að hætti Edge sveif yfir vötnum og tedrekkandi áhorfendur vel með á nótum. Þvínæst var það Agent Fresco sem fóru á algjörum kostum á KEX, ótúlegt band og meðlimir sem einn maður. Ég var fullkomlega orðlaus. Heim að hvíla sig (kl. bara 17.00) en svo fórum ég, Móa og Matt á stúfana. Snæddum á Asíu og á meðan Matt tók út landa sinn Tönju Tagaq í Fríkirkjunni fórum ég og betri helmingurinn á Kælan mikla (frábært) og svo á Perfume Genius. Ég hafði ekki hlakkað eins mikið til neins og vonbrigðin eftir því. Þetta var bara ekki að gera sig. Kíktum þá Biöncu Casady og það var ekki heldur að gera sig. Þá var ég búinn að fá nóg, við hentumst yfir á tómt KEX þar sem þetta er skrifað og nutum drykkja, áfengra sem óáfengra. Ljúft er það á þessum snilldarstað. Eins og alltaf er maður búinn að hitta gríðarlega mikið af vinum og félögum og það er mikið hlegið. Þetta er ekki bara tónlistin, svo margt annað og mikilvægt líka.

Iceland Airwaves 2015 – Laugardagur

Airwaves er rómantísk lyftistöng sagði vinkona mín við mig í kvöld og ég fattaði að það er alveg dagsatt. Maður þarf að redda pössun nokkur kvöld í röð og flækist svo um með betri helmingnum, snæðir, drekkur, spjallar og samhristingur þessi veitir yl í hjartað. Rétt misstum af Kælunni miklu í Gamla bíó en á sama stað tróð Dr. Gunni upp með miklum glans. “Ostrur”, “Glæpur gegn ríkinu”, “Grænir frostpinnar”, “Öxnadalsheiði”, “Ástfangi” m.a..Hrikalega gott gigg. Þvínæst var það kimono og þéttleikinn hrikalegur eins og við mátti búast. Rúlluðum yfir á Nasa þar sem Vök lék. Var að sjá þau í fyrsta skipti og þetta hljómaði virkilega vel. Allt á réttri leið einhvern veginn. Öruggt flæði í tónlistinni, ímyndarmál á tæru, allt mjög fullorðins. Tilvalið til stækkunar eins og sagt er og algjört “one to watch”. Fórum í Hörpu en varla séns að komast inn á Beach House vegna troðnings. Sáum tvö lög og það var gott, alltént betra en þegar ég sá þau síðast á Airwaves en þá var einhver fölvi yfir. Jack Magnet er að bræða hjörtu vor er þetta er ritað með funheitu fjúsjóni. Rozi Plain lék síðan tilraunakennt, þjóðlagaskotið rokk með miklum ágætum í Kaldalóni. Eftir það fór ég heim. Vaktin er að klárast hjá barnapíunni.

Iceland Airwaves 2015 – Sunnudagur

Héngum í Vodafonehöllinni allt kvöldið, ég og poppdoktorinn Matt Brennan. Fullt af vinum og kunnuglegum andlitum og svona þægilegur lokahnykksandi í gangi. Allir hressir og glaðir en kannski fallega þreyttir eins og ég kýs að kalla það. Góðir víbrar. Byrjuðum á því að ganga í flasið á Árna Matt, David Fricke og Ása Smekkleysu og eðlilega verður maður eins og skólastrákur í slíkum aðstæðum. dj flugvél & geimskip lék og ég dýrka þetta stöff. Björk meets The Residents. Frábært. Emmsjé Gauti og Úlfur Úlfur tróðu og upp, þétt og flott og rafmagnið í kringum rappsenuna í dag er mikið. Heillandi. Og ég fíla þetta stælalausa element, Úlfur Úlfur eru bara gaurar að tala texta um sín hjartans mál og ekkert bling-kjaftæði. Eitthvað raunverulegt við þetta og hressandi. Agent Fresco spiluðu eins og þeir ættu lífið að leysa að vanda en besta atriði kvöldsins – það langbesta – var Sleaford Mods. Eins hrátt og það gerist, einn þeirra ýtti á “play” á kjöltutölvu og dillaði sér á meðan hinn öskraði grimma, snjalla og samfélagslega meðvitaða texta af mikilli list. Ekkert brosað og svo bara af sviði. Magnað. Algerlega. Hot Chip svifu síðan á stuðvængjum þöndum út í nóttina.

Snilldarhátíð. Góðir straumar. Þar til næst…

 

Tagged with: