one direction

Greinin var skrifuð fyrir Morgunblaðið og birtist þar, laugardaginn 4. apríl, 2015

Farinn, búinn, bless?

• Zayn Malik hættur í strákasveitinni One Direction
• Örlög strákasveita eru nokkuð fyrirsjáanleg

Í síðustu viku var tilkynnt um brotthvarf Zayns Maliks úr strákasveitinni One Direction, en hún hefur borið höfuð og herðar yfir aðrar slíkar síðastliðin fjögur ár eða svo. Líkt og með Jackson 5, New Kids on the Block, Take That og Spice Girls, svo ég nefni nokkur hliðstæð dæmi, fer æði í gang hjá vissum aldurshópi (unglingum og líka for-unglingum). Viðkomandi sveitir verða ógurlega vinsælar og aðdáun nefnds hóps svo gott sem taumlaus. Til að setja þetta í sölulegt samhengi er One Direction fyrsta sveitin til að fara með fjórar breiðskífur beint á topp Billboard-listans og plata þeirra Midnight Memories frá 2013 var mest selda plata heims það árið – og það þrátt fyrir að hún hafi komið út í nóvember.

Fyrirbæri

Ferill svona fyrirbæra, svo ég klæði þetta í vísindalegan slopp, fylgir nokkuð hefðbundnum leiðum og fyrirsjáanlegum. Þetta er eins og hver önnur skáldsöguuppbygging. Einhver vinna á bak við tjöldin fyrsta hálfa árið eða svo, síðan fer allt í gang og vinsældir aukast með ógurlegum hraða. Þess er vandlega gætt að hala inn eins mikinn pening og hægt er á meðan tækifæri gefst og mynd af meðlimum er klínt á allt milli himins og jarðar. Svo kemur einhver miðja – sumir halda jafnvel að þetta muni vara að eilífu, fólk er farið að venjast þessu – en svo gerist það óhjákvæmilega. Það fer að glitta í lokin og uppleggið að endinum kom fram á miðvikudaginn er Malik tilkynnti að hann væri hættur (eftir að hafa séð kvikmynd um sveitina kemur það mér ekki á óvart að Malik hafi verið fyrstur til að fara). Það er líka hægt að sjá ákveðin merki ögn fyrr. Venjulega kemur fyrsta vísbendingin um að þetta sé að verða búið er sveitirnar gefa út „alvarlegu“ plötuna sína, sem er venjulega sú þriðja. Kampakát bros víkja fyrir svart/hvítum ég-er-alveg-alvörulistamaður-sko-svip. Grátbroslegt vegna þess að þeim plötum er venjulega ætlað að lengja í ferlinu með því að hrista upp í krakkapoppsformúlunni.

Endursköpun

Eigum við að gefa þessu tvö ár í viðbót? Plata haustið 2016 og tónleikaferðalag fram á sumar 2017? Kannski of vel í lagt. Hugsanlegt líka að menn hætti bara í enda árs, þegar yfirstandandi ferðalagi lýkur. Malik sagði enda að strákarnir myndu líklega halda áfram „um hríð“ og kom þar hugsanlega upp um að þegar sé búið að ákveða eitthvað í þeim efnum.
Á næstu árum eru það síðan sólóplöturnar. Niall Horan, Írinn, er tónvissastur þeirra félaga þannig að hann er líklegastur til að ríða á vaðið en ómögulegt er að segja til um hver þeirra nær að skapa sér slíkan feril og vísa ég þar í fordæmi Take That. Gary Barlow var talinn líklegur en það var ugluspegillinn Robbie Williams sem fór alla leið í þeim efnum. Og eftir tíu ár eða svo er það allir-vinir-á-ný-endurkomutúrinn. Take That tókst t.a.m. hið ótrúlega; að endurskapa sig sem fullorðinssveit og nýtur hún mikilla vinsælda í Bretlandi sem slík. En… heyrið þessi orð: Næsta „dæmi“ verður stúlknasveit. Það er pottþétt. Ég finn að það er verið að brugga þau ráð í þessum töluðum orðum.

Tagged with: