Follow
Greinin var skrifuð fyrir Morgunblaðið og birtist þar, laugardaginn 7. október, 2017
Hvaðan kom þetta eiginlega?
Páll Ivan frá Eiðum er tónlistarmaður sem vakti óvænta athygli með plötunni This is my Shit í fyrra. Platan er nú komin út á vínyl og á streymisveitunni Spotify.
Maður situr við tölvuna í desember í fyrra, eða var það nóvember, og fer í gegnum útgáfur ársins vegna dómnefndarstarfa fyrir Kraumssjóðinn. Margt er í gangi, alls kyns útgáfur, efnislega og ekki, en streymið er oft eina tilvistin sem sum verk falla undir. Ein af þessum streymisplötum er verk frá Páli Ivan, manni sem hefur verið reglulegur þátttakandi í jaðartónlistarmenningu Íslands undanfarinn áratug eða svo. Páll hefur verið að kasta út lagi og lagi á veitur eins og Youtube, Bandcamp og Soundcloud og heil plata, kölluð This is my Shit, lúrði þarna á Soundcloud. Fimmtán lög tekin saman, umslag og allt – sæmilega hryssinglegt, eitthvað sem var greinilega hent upp – en plata var þetta og útgefin, enda ínáanleg fyrir alla sem áhuga höfðu. Innihaldið var slíkt að Kraums-dómnefndin fór á hliðina, Páll var sannarlega með eitthvert „x“; furðuleg lög sem boruðu sér inn í mann, eiginlega einstök snilld sem vart er hægt að útskýra. Lög oft á yfirborðinu barnsleg og „asnaleg“, nánast eins og það hafi verið hrært í þau í einhverju flippi en undirtónninn í senn melankólískur og knýjandi. Textar ofureinlægir og afvopnandi, einhver ókennilegur sjarmi sem hreif heila dómnefnd með sér og skilaði Páli Kraumsverðlaunanafnbót.
Platan er ekki lengur inni á Soundcloud, en er hins vegar komin út efnislega og á streymisveitunni kunnu Spotify. Nýtt umslag og búið að hljómjafna allt batteríið. Páll Ivan hefur vakið nokkra athygli á samfélagsmiðlum, þar sem hann m.a. lýsir baráttu sinni við þunglyndi á óhemju hreinskilinn og drepfyndinn hátt. Öðru vísi er ekki hægt að lýsa því. Sjálfur segir hann að sú mikla samfélagsskömm eða „stigma“ sem fylgi geðsjúkdómum valdi því að oft fái hann fullt af skilaboðum frá fólki í svipuðum sporum þegar hann póstar einhverju sem því tengist. Um þetta semur hann m.a. tónlist, sjá t.d. hið magnaða „Taktu lyf“. Maður fær næstum því tár í augun við að hlusta, þetta er á sama tíma ógeðslega fyndið og ógeðslega sorglegt. Lagið hefst á mónótónískum söng Páls þar sem hann segir: „Ég er fáránlega hress í dag, það er ekkert að angra mig…“ en skömmu síðar syrtir verulega í álinn. Bakraddakór, sem er viljandi hallærislegur, hvíslar því að okkar manni: „Ekki gefast upp!“ Heyrn er sögu ríkari. Allt er með þessum hætti, alvara en um leið heilnæmur skammtur af kaldhæðni og alltaf spaugileg uppbrot á hárréttum stöðum. Uppáhaldslagið mitt á plötunni er lokalagið, „Haeyiou“, óður til spagettívestra og Lone Ranger. Ótrúleg smíð.
Þessi sýn Páls og kímnigáfa liggur yfir öllu, svona kynnir hann sig t.d. á Karolinafund-síðunni: „Ég kalla mig Páll Ivan frá Eiðum og er tónskáld, lagasmiður, hljóðfæraleikari og myndlistarmaður. Ég er líka einn af stofnendum tónsmiðasamtakanna SLÁTUR. Svo er ég líka voða mikið á feisbúkk… æ….“ og þetta færðu ef þú styrkir plötu um 240 kr.: „Þú færð þessa notalegu tilfinningu sem maður fær þegar maður hjálpar einhverjum eða gefur gjöf :)“.
Platan This is my Shit kemur út hjá Mengi Records og það verða tónleikar vegna hennar, í Mengi, þann 27. október næstkomandi.
Deildu!
