Ljósmynd/Klaki

Greinin var skrifuð fyrir Morgunblaðið og birtist þar, laugardaginn 24. febrúar, 2018

 

Grasrótin er í góðum málum


Plötuútgáfan Why Not? er einn helsti merkisberi ærlegrar neðanjarðarrokktónlistar á Íslandi í dag. Plata Dead Herring var til að mynda ein af allra bestu rokkskífum síðasta árs.

Ægir Sindri Bjarnason, trymbill nokkurra sveita (t.d. Logn, World Narcosis og Dead Herring) fer fyrir merkinu og það er ágætt að miðja þessa grein með því en útgáfur þess endurspegla eðlilega að einhverju leyti þá grósku sem í gangi er hvað hrátt og öflugt neðanjarðarrokk varðar. Sú sena býr yfir nokkrum sprotum; Myrkfælni er einn, Þórir Georg og hans fólk reka nokkur verkefni og svo er það virknin í kringum Börn, Dauðyfli og tengdar sveitir. Og ég er alveg ábyggilega að gleyma einhverju og það vonandi (ábendingar um frekari virkni sendist endilega á netfang).

Einbeitum okkur nú að Why Not? og starfseminni þar sem hefur verið með miklum ágætum undanfarin misseri. Fyrsta útgáfan var fyrir margt löngu reyndar, sjötomma með World Narcosis sem kom út 2010. Tvöfalda platan World Coda kom svo út 2015 og eftir það hafa hjólin snúist nokkuð ört. Sama sveit gaf þannig út plötu 2017, sama ár kom út sjötomma með henni einnig og síðasta október kom út plata sveitarinnar Grit Teeth. Segja má að merkið hafi sprungið út á síðasta ári en einnig kom út plata með hinni mergjuðu sveit Dead Herring og dómsdagsrokkurunum í Godchilla. Einnig hafa komið út stafrænar safnplötur.

Senur þrífast á fólki sem leggur sjálft sig og tónlistina sína til en einnig á rýmum sem hýsa reglulega tónleika. Þegar þú ert kominn með a) stað og b) reglubundna dagskrá er hægt að næra senuna. Fólk hittist reglulega og hlustar ekki bara á tónlist heldur spjallar saman, skiptist á hugmyndum, treystir vináttubönd og stofnar hljómsveitir. Tónleikastaðurinn R6013, Ingólfsstræti 20, hefur reynst mikilvægt skjól fyrir senuna. Ægir Sindri lýsti hugmyndafræðinni svona í Fésbókarpósti: „Mér finnst mikilvægt að það sé regluleg og fjölbreytt dagskrá í boði yfir allt árið, í rými sem býður alla velkomna; er ekki ætlað einum aldursflokki meira en öðrum eða bundið skólum eða klúbbum … Ætlunin með R6013 er að bjóða upp á svoleiðis rými, sem auk þess reynir ekki að selja þér neitt með gróða að leiðarljósi (þótt vissulega séu hljómplötur og annar hljómsveitavarningur í boði) … Plássið er kannski ekki stórt, en það kemst ansi mikil orka fyrir í minnstu rýmum og smæðin skapar aukna nánd sem mér þykir mjög vænt um … Frjáls framlög og önnur aðstoð er vel þegin. Við erum stöðugt að vinna í að bæta rýmið enn frekar og hugmyndir að frekari bótum eru velkomnar.“

Nú er plássið búið en upprunalega ætlaði ég fyrst og síðast að vekja athygli á Dead Herring, hljómsveit sem ég elska. Seint á árinu 2016 kom út tónleikaplata, Tuna in Trouble, eingöngu á bandcamp (og er ekki með vörunúmer hjá Why Not?) og fyrir stuttu kom platan Drowned in Rock út (væntanleg á vínyl hvað af hverju). Orkuríkt, ástríðufullt rokk sem er ekkert nema risastórt hjarta út í gegn. Hreint út sagt stórkostlegt stöff.

 

 

Tagged with:
 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Set your Twitter account name in your settings to use the TwitterBar Section.
Follow

Get every new post on this blog delivered to your Inbox.

Join other followers: