[Greinin var skrifuð fyrir Morgunblaðið og birtist þar, laugardaginn 6. október]

Töfrum sleginn bastarður

• Á mánudaginn verður Magical Mystery Tour Bítlanna endurútgefin
• Enn ein tilraunin til að bæta hlut þessa umdeilda verks?

Þegar súrrealísk vegamynd Bítlanna, Magical Mystery Tour, var sýnd um jólin árið 1967 í BBC var það í svart/hvítu. Ekki beint bestu útsendingarskilyrðin fyrir mynd sem umfaðmaði litríkan gleðiboðskap ástarsumarsins fræga. Myndin var fyrsta bakslagið á ferli Bítlanna sem höfðu verið á þráðbeinni leið upp á við allt síðan fyrsta smáskífan, „Love Me Do“, kom út 5. október árið 1962 (sem sagt, fyrir nákvæmlega 50 árum og einum degi!). Þeir hörðustu vilja meina að hvort sem horft sé á myndina í svart/hvítu eða ekki hafi þetta ævintýri Bítlanna verið dauðadæmt frá byrjun, hugmyndafræðin á bak við það hafi einfaldlega ekki haldið vatni, sama hvað Paul McCartney reyni að verja það en hann var potturinn og pannan í því.

Engin jarðtenging

Tímamótaverkið Sgt. Pepper’s Lonely Hearts Club Band hafði óhjákvæmilega ákveðinn niðurtúr í för með sér en það verk kom út um sumarið 1967. En McCartney, vinnuhestur bandsins, reif félaga sína upp um haustið og lagði til að þeir myndu gera kvikmynd.
Bítlarnir leigðu sér rútu, fylltu hana af furðufuglum og keyrðu út á land, án handrits, og leyfðu hlutunum að gerast, leyfðu þeim að „fljúga frjálsum“ eins og andi tímans sagði til um. Ian MacDonald, einn helsti Bítlafræðingur heims og höfundur hinnar áhrifamiklu Revolution in the Head segir í þeirri bók að myndin væri sönnun þess að Bítlarnir hefðu misst jarðtengingu þetta árið, hefðu verið á því að þeir gætu boðið fólki upp á hvað sem er. Sjálfsgagnrýnin hefði gufað upp með hinni geigvænlegu frægð og stöðugt vaxandi lyfjaneyslu.

Myndin var tekin upp á tveimur vikum, yfir tíu tímar rötuðu inn á band en ekki nema 52 mínútur enduðu á skjáum breskra áhorfenda um jólaleytið og fólk var síður en svo sátt. Þeir félagar, meira að segja McCartney, reyndu árin á eftir að hvítþvo sig af því hver hefði átt hugmyndina þó að McCartey gangist glaður við henni nú enda er allt sem Bítlarnir gerðu skíra gull í huga fólks í dag.

Glás

Myndin kemur út á nýjan leik eftir helgina á mynd- og blágeisladiski og er búið að hreinsa upp bæði hljóð og mynd (og verður hún líka sýnd í völdum kvikmyndahúsum víða um heim af þessu tilefni en þetta er í fyrsta sinn sem slíkt er gert). Fyrir þá lengst gengnu er sérstakur safnkassi í boði þar sem m.a. er að finna 60 síðna bók og endurútgáfu á stuttskífunni sem kom út upprunalega árið 1967 sem tvöföld sjötomma.
Glás af fráklippi verður þá að finna þarna auk þess sem ný viðtöl við Paul McCartney og Ringo Starr eru á diskunum. Yfirtal leikstjóra sem oft er í boði á svona útgáfum er þá í höndunum á McCartney. Góða skemmtun – eða ekki.

3 Responses to Bítlarnir: Keyrðu þeir út í skurð?

    • Ari Egilsson says:

      Fór á magical m.tour í bíó nýlega og hún var að mestu léleg, það var eiginlega ekkert 'point' í henni og jafnvel sem vitleysisgangur var hún ekki fyndin, en einstaka glefsur voru flottar, eins og músíkin sem kemur af og til inní, sem er einstaklega gaman að heyra í bíóhljóðkerfi, t.d. fool on the hill og your mother should know. Ég varð reyndar f. miklum vonbrigðum því ég misskildi eitt, hélt að side 2 af plötunni væri í myndinni! (sem er með magnaðri lögum)

    • Gaman og fróðlegt að lesa svona dóm um myndina Ari. Ég hef aldrei séð hana nema í glefsum en trúi því vel sem þú ert að segja.

Leave a Reply

Your email address will not be published.

This site uses Akismet to reduce spam. Learn how your comment data is processed.

Set your Twitter account name in your settings to use the TwitterBar Section.
Follow

Get every new post on this blog delivered to your Inbox.

Join other followers: