Follow
Club Cubano (Live at Mengi) er plata eftir bassaleikarann góðkunna Halla Guðmunds, Harald Ægi Guðmundsson.
Hljómsveitin Club Cubano leikur tónlistina, sem er öll eftir Halla, og það í Mengi eins og titillinn gefur til kynna. Halli hefur gert alls kyns tónlist í gegnum tíðina og er stílleg hamhleypa, skoðar, kannar og drekkur í sig sem óður væri. Platan á undan þessari, Tango for one, var í bossanova-stíl en þessi plata hér er undir sterkum kólumbískum og kúbönskum áhrifum. Í Club Cubano eru þeir Hilmar Jensson (rafgítar) Jóel Pálsson (tenor/sópran saxófónn) Daníel Helgason (tres gítar, orgel og upptökustjórn), Matthías Hemstock (trommur), Kristofer Rodriguez Svönuson (slagverk) og Halli sjálfur sem leikur á rafbassa.
Íslenskir tónlistarmenn hafa endrum og eins farið suður á bóginn, líkamlega sem áhrifalega, og komið til baka með gull. Tómas R. og Kúba, Hjálmar í Jamaíku, Bubbi og Kúba og gleymum ekki rómönsku gítarplötunni hans Túngumál. Los Bomboneros og Ingvi Þór, Sammi Jagúar og svo má áfram telja lengi vel. Halli er kominn í þennan góða hóp.
Spilamennskan hér er þétt og góð og það virkar vel að hafa áhorfendahróp á milli laga. Ýtir undir stemningu. Lögin eru öll eftir Halla eins og nefnt hefur verið og í áðurnefndum stíl. Lögin eru mismunand að gerð, stundum er farið á fullt, sveiflan hamslaus en önnur lög ballöðukenndari. Ég skynja gáska í hraðari lögum, lög sem líkjast höfundinum mætti segja. Orkurík, innileg, ástríðufull – beint af augum! Það er síðan eðlilega unun að hlusta á ÞESSA hljóðfæraleikara spila enda valinn maður í hverju rúmi. Gítarsprettir, blástur og slög, allt gengur þetta dásamlega upp og unun er á að hlýða.
Hvað næst Halli minn? Það er spurning sem ekki er auðvelt að svara, miðað við fjölskrúðugheitin sem á borð hafa verið borin hingað til….
Deildu!
