Follow
Greinin var skrifuð fyrir Morgunblaðið og birtist þar, laugardaginn 19. desember, 2020.
Geymdu það ei til jóladags…
Heimtur hvað nýjar íslenskar jólaplötur varðar þetta árið eru með besta móti en sex nýjar slíkar höfðu borist pistilritara fyrir prentun. Ólíkar um margt en sameinaðar í tónrænni hyllingu á jólatíðinni.
Fyrst ber að nefna plötu stórsöngkonunnar Jóhönnu Guðrúnar, Jól með Jóhönnu (sem ber sama nafn og jólaplata hennar frá 2002!). Ég er mjög ánægður með framstillinguna á plötunni og þá hugmyndafræði sem lagt er upp með. Hér er bókstaflega farið alla leið í glæsi- og hátíðleik og það undirstrikað með umslaginu sem endurspeglar innihaldið skemmtilega. Platan inniheldur fimm frumsamin lög og fimm tökulög og þeir Sverrir Bergmann og Eyþór Ingi Gunnarsson gesta í hvoru laginu fyrir sig. Davíð Sigurgeirsson, eiginmaður Jóhönnu, stýrir upptökum.
Björgvin Halldórsson, herra jól, gefur þá út veglega safnplötu, Ég kem með jólin til þín . Kemur hún m.a. út á tvöföldum lituðum vínil. Á plötunni eru þrjú ný lög, „Ljós þín loga“ er samið af Halldóri Gunnari Pálssyni og textinn er eftir Braga Valdimar Skúlason. Hin nýju lögin eru „Koma jól“ sem Björgvin syngur með Margréti Eiri og „Alltaf á jólunum“. Það er óþarfi að tíunda framlag Björgvins til jólalagahefðar Íslendinga, en ekki bara að hann hafi staðið að útkomu fjölda löngu sígildra laga heldur hefur hann og haldið vinsæla jólatónleika sem verður nú streymt vegna yfirstandandi árferðis.
Þau Sigríður Thorlacius og Sigurður Guðmundsson hafa haldið jólatónleika um árabil, gefið út jólaplötur hvort í sínu lagi en fyrir þessi jól gefa þau út plötuna Það eru jól sem geymir safn laga eftir þau að viðbættum þremur spánnýjum lögum. Íslensk-sænska tónlistarkonan Hanna Mia Brekkan hefur þá gefið út fimm laga stuttskífu, Winter Songs . Þar flytur hún jólalög eftir konur og eru útsetningar með þjóðlagablæ. Hanna er, eins og svo margir, föst á Íslandi vegna kófsins og kemst ekki til Svíþjóðar. Setti hún plötuna saman sem eins konar jólagjöf til ættingja sem hún getur ekki hitt. Um sannkallað alþjóðasamstarf er að ræða en Færeyingurinn Sakaris Emil Joensen upptökustýrði og Englendingurinn Tom Hannay söng bakraddir ásamt systur Hönnu, Emily Reise. Bráðum koma blessuð jólin er síðan ósungin plata eftir Hörpu Þorvaldsdóttur og Kristin Svavarsson og er innihaldið bæði gömul íslensk lög og smíðar af helgara tagi.
Síðast en ekki síst er að nefna plötuna Gleðilega hátíð með Lalla töframanni. Þar flytur Lalli tólf jólalög með íslenskum textum, bæði gömul og ný. Fjölbreyttur hópur listafólks á lög og texta á plötunni, má þar nefna Ómar Ragnarsson, Ingibjörgu Gunnarsdóttur, Megas og Justin Bieber! Tónlistarstjóri plötunnar er Daði Birgisson.
Auk þessa hefur verið að koma út fjöldinn allur af stökum lögum, eftir Purumenn (tveggja laga smáskífa), og Baggalútur, Valdimar Guðmundsson og Bríet eiga þá eitt vinsælasta lag landsins um þessar mundir, „Jólin eru okkar“. Streymisveitur af alls kyns toga hafa gert svona smáskífustarfsemi auðveldari en ella og óhægt að henda reiður á jólalagaflóðinu. Tugir annarra laga hafa verið að koma út sem ég ætla ekki að reifa sérstaklega.
Hvort eitthvað af þeim plötum sem hér hafa verið taldar upp ná að öðlast sígildan sess mun tíminn einn leiða í ljós náttúrlega. Eitt er þó víst; við þurfum meiri íslenska jólatónlist, íslenska jólatexta og stöðuga endurnýjun innan þessa undurfurðulega geira. Til er fólk sem segist ekki þola jólatónlist og ég – eins og einhver hefur mögulega tekið eftir – á afar erfitt með að skilja þann þankagang. Ljúflingstónlist sem fjallar á ljúfan hátt um ljúflingstíð. Er hægt að biðja um það betra? Gleðileg jól, kæri lesandi!
Deildu!
