Follow
Greinin var skrifuð fyrir Morgunblaðið og birtist þar, laugardaginn 20. desember.
Ég plötur verð að fá …
Ég ákvað að snúa lítið eitt upp á textabrot úr hinu stórkostlega jólalagi „Jólin eru að koma“ í titli pistilsins en Í svörtum fötum flutti það lag af fítonskrafti miklum hér um árið. Þar segir sögumaður frá því að hann þurfi að fá gjafir og engar refjar, burtséð frá kærleiksanda jólanna og öllum þeim góða boðskap sem þeim fylgir. Og sama segi ég þegar kemur að jólaplötum. Þær þarf ég að fá frá hérlendu tónlistarfólki og blessunarlega duttu nokkrar slíkar í ylhýran kofann þetta árið.
Ærslafengnar útsetningar
Fyrsta ber að nefna plötuna Í takt við jólin sem Salka Sól og Stórsveit Reykjavíkur standa að en útsetningar og stjórn var í höndum Eiríks Rafns Stefánssonar. Graduale Futuri-kór Langholtskirkju syngur líka á plötunni. Um er að ræða tíu íslensk, sígild jólalög og eru þau sett í djassaðan, á stundum ærslafenginn búning, enda nóg af blásurum í sveitinni og stuðið eftir því. Eiríkur hefur glúrið nef fyrir því hvað er hæfandi og hvað ekki og t.d. er „Jólasveinar ganga um gólf“ sett í næsta dulrænan búning, James Bond-leg spenna gárar undir framvindunni og heldur okkur á bríkinni. „Höfuð, herðar, hné og tær“ er hins vegar sett í rakettubúning, allt vitlaust allan tímann og kór, sveit sem og Salka á útopnu út í gegn.
Salka syngur eins og sú sem valdið hefur á plötunni, er blíð og æst til skiptis og eins og sjá má þá eru þetta að stofni til jólaballalög, lögin sem leikin eru þegar gengið er í kringum jólatréð með ungviðinu. „Adam átti syni sjö“ verður þannig að svalri djassreið á meðan „Í skóginum stóð kofi einn“ er snúið upp í hálfgerða rökkurballöðu. Þetta er vel heppnað allt saman og skemmtilegt, útsetningar bera með sér, eins og segir, nýlundu og sköpunarþrótt og samvera með plötunni hin ánægjulegasta í alla staði.
Tengdamömmur og pabbar
Hin snilldarlega titlaða plata Jólaboð hjá tengdó er eftir Leif Gunnarsson og hún inniber átta lög eftir Leif sjálfan. Tilurðin er athyglisverð en Leifur lýsir henni svona: „Kveikjan að plötunni er í stuttu máli sú að ég á afmæli í desember og hefur alltaf þótt það óþolandi vesen. Það að semja og taka upp heila plötu af nýrri, frumsaminni jólatónlist er mitt persónulega „detox“ við þeirri gömlu gremju.“
Platan er djössuð, líkt og platan að ofan, og fjöldi samstarfsfólks kemur að henni. Lög eru með alls kyns sniði, gestasöngvarar koma við sögu og textar oft og tíðum launfyndnir. Hljómsveitin LÓN gaf þá út þrælgóða fimm laga plötu fyrir þessi jól, Pabbi komdu heim um jólin, en árið 2022 gaf sveitin út stóra plötu með jólaefni, Fimm mínútur í jól. RAKEL syngur í öllum lögunum hér og andinn er ljúfur, innilegur og umvefjandi.
Svo er alltaf eitthvað um það að stök lög komi út. Marsibil (Una Schram og Kári Hrafn Guðmundsson) gáfu t.d. út tveggja laga skífu, Allt eins og það á að vera, og Þórir Georg gaf út tveggja laga skífu einnig þar sem „All I Want For Christmas“, sem frægast er í flutningi Mariuh Carey, prýðir A-hliðina. Platan kemur í tuttugu númeruðum eintökum í handgerðu umslagi eftir Þóri sjálfan og er gefin út af Reykjavík Record Shop.
Deildu!
