Follow
Greinin var skrifuð fyrir Morgunblaðið og birtist þar, laugardaginn 27. desember.
Af fjöllista- og ofurkonu …
Laurie Anderson flytur Republic of Love í Hörpu 7. janúar 2026. Einn þekktasti og um leið helsti brautryðjandinn á sviði margmiðlunarlista. „Ég hlakka til að koma til Íslands“.
Laurie Anderson, einn þekktasti og um leið helsti brautryðjandinn á sviði margmiðlunarlista, er á leiðinni til Íslands eftir áramót og ætlar að sinna einu og öðru eins og hún tjáir blaðamanni. Hún mun m.a. koma fram í Hörpu miðvikudaginn 7. janúar næstkomandi þar sem hún mun flytja spánýtt verk, Republic of Love, þar sem tengsl ástar og valds eru skoðuð í gegnum tónlist, frásögn og myndræna framsetningu, nálgun sem Anderson hefur hlotið heimsfrægð fyrir. Í Hörpu mun víóluleikarinn Martha Mook koma fram með henni og svo munu hún, Mook og Íslandsvinurinn Eyvind Kang troða upp í Listasafni Íslands daginn eftir. Eitthvað ætla þau Skúli Sverrisson að bauka saman líka en Skúli hefur unnið náið með Anderson í gegnum tíðina.
Uppgangur fasismans
Ég var sem sagt svo heppinn að eiga þess kost að taka viðtal við Anderson sem við og gerðum fyrir tilstuðlan Zoom. Hún gaf sér tíma í hádeginu til að spjalla við blaðamanninn og úr varð hin skemmtilegasta stund. Hispursleysið var þægilegt, Anderson hitaði sér te á meðan, leitaði að hleðslusnúrunni sinni og sinnti hundinum sínum Willie – svona meðal annars. Ég tók mér því það bessaleyfi í bláendann að sýna henni hörpu dóttur minnar sem lúrði í bakgrunninum. Já, gott og gefandi spjall var þetta!
„Ég hlakka til að koma til Íslands,“ tjáir Anderson mér. Röddin er blíð og stóísk og hún brosir fallegu, styrkjandi brosi út viðtalið. „Það er svo langt síðan ég kom síðast að ég man ekki einu sinni hvenær!“ Hún segist þakklát fyrir að hafa fengið boð um að taka þátt í sýningunni Steina: Tímaflakk sem er fyrsta yfirlitssýningin á verkum Steinu Vasulka á Íslandi en tónlistaratriði þremenninganna tengist inn í hana. Steina sé góður vinur og Woody, maður hennar heitinn, var það einnig. Hún segir mér svo frá því að Republic of Love eigi sér rætur í verki sem hún flutti í Vín nú í vor. „Ég var beðin að tala um uppgang fasisma í Evrópu og ég hugsaði, „er það góð hugmynd?“ (hlær). Ég fæ sjaldan beiðni um að búa eitthvað til, vanalega er ég bara í mínu. Ég var beðin að tala um ást og ríkisstjórnir þarna og mér fannst það svo áhugavert eitthvað að ég spenntist öll upp.“
Sérhæfð í miðlaflökti
Ég nota tækifærið og spyr hana aðeins út í viðhorf hennar til listsköpunar almennt. Hér er um að ræða listakonu sem vinnur gagngert þvert á miðla og er líklega einn farsælasti listamaður allra tíma hvað það varðar og klárlega sá þekktasti hvað almenning varðar.
„Mig langaði til að gera alls konar og ég fylgdi því,“ svarar hún. „Þetta var ekki mjög meðvituð ákvörðun og athugaðu að það er oft styttra á milli þessara miðla allra en fólk gerir sér grein fyrir. Stundum þegar ég mála þá líður mér eins og ég sé að búa til tónlist. O.s.frv. Steina hafði t.d. mikil áhrif á mig hvað þetta miðlaflökt varðar.“
Anderson fer aðeins úr mynd núna og nær í pappírsörk þar sem er að finna texta og teikningar eftir hana. Eitthvað sem hún er að vinna að um þessar mundir, útskýrir hún. Talandi um að komast nálægt listamanninum! En það varði ekki lengi því að Anderson stekkur óforvarandis úr rammanum til að sinna Willie. „Hann er gamall,“ segir hún af miklu ástríki og alúð.
Ég enda svo á því að tala aðeins við hana um hörpuna. Anderson ljómar og það stafar af henni áþreifanlegur áhugi. „Ég elska iðn, færni og sérhæfingu,“ segir hún. „Og mín sérhæfing felst í því að ferðast á milli þessara miðla og samtengja þá.“
Deildu!
