Follow
Greinin var skrifuð fyrir Morgunblaðið og birtist þar, laugardaginn 6. september, 2014
Um óttubil
• Kate Bush sneri aftur til hljómleikahalds í síðustu viku eftir 35 ára hlé
• 22 tónleikar og uppselt á þá alla
Kate Bush er Björk þeirra Breta, óendanlega framsækinn listamaður sem fer alltaf þangað sem hjarta hennar býður um leið og hún nýtur bæði almennra vinsælda og virðingar. Að slá þessu tvennu saman er ekki á allra færi og Bush nýtur þess að vera nokkurs konar þjóðargersemi. Undanfarna áratugi hafa aðdáendur þurft að þola talsverða bið hvað nýtt efni varðar, langur tími hefur liðið á milli platna, en það er þó ekkert miðað við tónleikaframkomu en síðustu tónleikar hennar – þangað til í ár – fóru fram árið 1979. Aðdáendur rak því í mikinn rogastans er hún tilkynnti endurkomu á sviðið á þessu ári og seldust allir miðarnir upp á korteri.
Axir og keðjusagir
Að segja að tónlistarheimurinn hafi farið á hliðina við þessar fréttir nægir varla til að lýsa þeim látum sem fóru í gang og standa nú yfir. Fyrstu tónleikarnir fóru fram í Hammersmith Apollo í Lundúnum 26. ágúst síðastliðinn og þegar þetta birtist var þeim sjöundu að ljúka. Nærfellt allir miðlar hafa ausið tónleikana einróma lofi, sérstaklega passa breskir upp á „sína“ konu og það þarf verulega að leggja sig fram ætli maður að finna eitt einasta hnjóðsyrði. Tónleikaröðin kallast Before the Dawn og gæðablaðið Guardian var með fjölmennt teymi sem sinnti fyrstu tónleikunum með beinni blogglýsingu þar sem tíst, ljósmyndir og þvíumlíkt flæddu um meðan á þeim stóð. Tim Jonze, einn gagnrýnendanna, símaði inn myndskeið um leið og þeim sleppti þar sem hann rekur stemninguna og furðaði hann sig á því að í fyrstu lögunum var sviðið fremur strípað, Bush einfaldlega söng nokkur af sínum þekktustu lögum ásamt hljómsveit (þar sem Friðrik „okkar“ Karlsson er m.a.!). Allt í einu hafi svo draumveröld lokist upp og kollegi hans, Alexis Petritis, lýsir þessu sem svo í dómi sínum: „Dansarar í björgunarvestum með axir og keðjusagir, risaþurrísvél, furðulegar vangaveltur um pylsur, gerviöldur, fólk í fiskabeinagrindum og sextán ára gamall sonur Bush að rífast við trébrúðu,“ og svo bætir hann við í kersknislegum tón: „Þeim sem hugnast best eitthvað einfalt ættu að halda sig sem lengst frá þessum tónleikum.“ Það var reyndar sterkur grunur um að eitthvað svona væri í vændum en eina tónleikaferðalag hennar til þessa, sem fór fram í apríl og maí 1979, einkenndist af stórfenglegu sjónarspili þar sem búningar, dans og ókennilegur draumveruleiki réð för.
Heimsmet
Þjóðargersemin Bush var sett undir smásjána fyrir stuttu í klukkustundar langri heimildarmynd framleiddri af BBC sérstaklega vegna endurkomunnar. Þar eru ýmsir kallaðir til og athyglisvert að sjá hversu ólíkur bakgrunnur þeirra er. Bat for Lashes, St. Vincent, Brett Anderson, David Gilmour og Peter Gabriel voru fulltrúar þeirra sem búast mátti við en þarna voru og Tricky, Big Boi (úr Outkast) og John Lydon og máttu þeir vart mæla vegna hrifningar á þessari andlegu systur sinni.
Lokatónleikarnir verða síðan 1. október næstkomandi og ekkert hefur verið gefið upp um framhald, aðra plötu eða þvíumlíkt. Hins vegar setti hún heimsmet í síðustu viku, er átta plötur á hennar nafni fóru inn á topp 40-listann í Bretlandi yfir mest seldu plöturnar. Aðeins Bítlarnir og Elvis hafa náð betri árangri að þessu leytinu til. Kata rokkar.
Deildu!
