Follow
Greinin var skrifuð fyrir Morgunblaðið og birtist þar, laugardaginn 5. mars, 2022.
Söngurinn yngir, kætir og bætir
Hér verður seinni skammtur þeirra laga sem keppa um sæti í Söngvakeppni evrópskra sjónvarpsstöðva tekinn til kostanna.
Allt var eðlilegt í síðustu viku, upp á hvað fór áfram. Hrein gæði í systrasöng þeirra Siggu, Betu og Elínar, veri það í flutningi, lagasmíð eða þeim sjarma sem sveif yfir, fleytti þeim nokkuð örugglega áfram. Lagið var svona það „ójúróvisjónlegasta“ en við höfum mýmörg dæmi um að einmitt slík lög hafi farið langt. Árangur Stefáns Óla var einnig verðskuldaður. En athugum nú hvernig umhorfs er í lagapakka þessarar helgar.
Lag: Mögulegt / Possible
Höfundur lags: Markéta Irglová.
Höfundar texta: Markéta Irglová og Sturla Mio Þórisson (ísl.), Markéta Irglová (ens.).
Flytjandi: Markéta Irglová.
Ægifögur og giska sterk byrjun opnar þetta lag. Viðkæmnislegt lag – en um leið sterkt – og strengir renna fljótlega stoðum undir undurfagran söng Markétu. Klassísk hughrif kalla fram lög eins og „Hægt og hljótt“ eða hægu kaflana í „Euphoria“. Lagið er dálítið í einni stemningu út í gegn, í algeru flæði, og í því liggja töfrar þess. Enyu-aðdáandi eins og ég er líka kominn djúpt inn í galdragerði. Einfalt og barasta mjög fallegt lag, „ójúróvisjónlegt“ eins og ég segi í inngangstexta, og það bara vex og vex í eyrunum þar sem ég sit og set þessar hugleiðingar niður. Megi það fara með himinskautum í kvöld.
Lag: Hækkum í botn/Keep it cool
Höfundar lags: Sveinn Rúnar Sigurðsson og Valgeir Magnússon.
Höfundar texta: Valgeir Magnússon og Davíð Guðbrandsson (ísl.), Sanna Martinez, Anders Eriksson, Marc Caplice og Valgeir Magnússon (ens.).
Flytjandi: Suncity og Sanna Martinez.
Hoppandi og skoppandi gleðistemma. Dúett þeirra Suncity og Sönnu virkar vel og þær keyra lagið áfram með reffilegum hætti. Einfaldleikinn er samt ekki að vinna sérstaklega með smíðinni. Versið er ekki nema svona rétt sæmilegt, viðlagið snöggtum skárra en þó ekki sérstaklega frumlegt. Gerir þó það sem því er ætlað, að draga hlustandann inn, krækja í hann. Það hefði þurft að henda í betri brú/uppbrot eftir miðbikið því þá er lítið að frétta og lagið orðið helst til endurtekningarsamt. Þær stöllur gætu samt trekkt í útsendingunni, af útgeislun eiga þær nóg þó að efniviðurinn sé lakur.
Lag: Tökum af stað/Turn This Around
Höfundar lags: Reykjavíkurdætur (Daughters of Reykjavík).
Höfundar texta (ísl. og ens.): Reykjavíkurdætur (Daughters of Reykjavík).
Flytjandi: Reykjavíkurdætur (Daughters of Reykjavík).
Einkennismerki Dætranna eru á fullu flassi frá fyrstu sekúndu, talað um „slæmar tíkur“ o.s.frv. Eftir kröftugt innslag í upphafi er hent í hressilegt viðlag og undirspilið er í senn draugalegt og „upptekið“ (e. busy). Grallaraskapur í bland við afdráttarleysi eins og Dætrunum er einum lagið. Það er eitthvað söngvakeppnislegt við þetta samt en allt á forsendum sveitarinnar. Mann grunar að flokkurinn sé með eitthvert svakalegt sviðsatriði í undirbúningi og ég verð illa svikinn ef það verður ekki hent í eitthvað slíkt. „Þeir elska okkur einar/en þeir hata okkur saman“. Snilldarlína.
Lag: Þaðan af/Then Again
Höfundar lags: Jóhannes Damian Patreksson, Kristinn Óli S. Haraldsson, Hafsteinn Þráinsson og Snorri Beck.
Höfundur texta (ísl. og ens.): Kristinn Óli S. Haraldsson.
Flytjandi: Katla.
Stórt lag. Aleflisbyrjun, sem hækkar hratt og vel. Katla sest svo niður í laglínuna, fylgir henni með kraftmiklum löngunarfullum söng. Undirspilið er feitur, næsta „industrial“-kenndur, ásláttur í bland við drungaleg tölvuhljóð. Þetta er svona ofurballaða sem er sungin í lok kjarnorkustríðs. Eða kjarnorkuveturs (náðuð þið þessum?). Textinn er góður og maður nemur þarna sígildar Króla-hendingar. Lagið er knosaður köggull eiginlega, myrkur og miskunnarlaus, og ég er svona enn að gera það upp við mig hvort ég sé að fíla þetta vel eða miður. Spyrjum að leikslokum.
Lag: Séns með þér/Gemini
Höfundar lags: Hanna Mia Brekkan og Sakaris Emil Joensen.
Höfundar texta: Nína Richter (ísl.), Hanna Mia Brekkan og Sakaris Emil Joensen (ens.).
Flytjandi: Hanna Mia Brekkan and The Astroutourists.
Listaskólagengnir Skandinavar með tengingar við Færeyjar, Frón og Svíaríki. Þetta er skrítipopp af bestu gerð, útsetning og hljómur með dáleiðandi, pínkuskringilegum tón – smá Cardigans-blær jafnvel. Um leið er nokkuð sígildur lagasmíðabragur yfir enda búa Hanna og Sakaris yfir ríkri reynslu á því sviðinu. Textinn fyndinn og gáskafullur („Eftir eitt, tvö, þrjú, kannski fleiri vil ég eiga með þér … ketti, hunda, whatever“). Þetta er algert „dökkt hross“, nánast of gott fyrir þessa keppni (var ég að segja þetta?) en ég vona innilega að þetta fari alla leið. Ég er kolfallinn.
Deildu!
