Follow
Þorsteini Einarssyni. — Ljósmynd/Benni Valsson.
Greinin var skrifuð fyrir Morgunblaðið og birtist þar, laugardaginn 11. desember, 2021.
Ævintýrið góða heldur áfram
Tvær nýjar plötur bættust við útgáfuröð President Bongo, Les Aventures de President Bongo, í dag. Annars vegar plata með dúettinum Uwaga og hins vegar tónlistin við kvikmyndina Á annan veg.
President Bongo er listamannsnafn Stephans Stephensen sem færi líklega best á að kalla fjöllistamann þar sem hann myndar, hljóðritar, skífuþeytir, dansar, gefur út, siglir fleyjum, bakar pítsur og klífur fjöll. Og gerir sirka skrilljón hluti í viðbót.
Árið 2018 setti hann í gang útgáfuröðina Les Aventures de President Bongo til heiðurs belgíska ævintýramanninum Tinna, auðvitað (en hann skilgreindi hvað það er að vera ævintýramaður á 20. öldinni samkvæmt forsetanum). Alls eru 24 plötur áætlaðar og eru sex þegar komnar út. Árið 2018 kom út plata með endurhljóðblöndunum á tveimur Tilbury-lögum og sérstök útgáfa af plötu Högna Egilssonar, Shed your Skin. Árið 2019 var það Quadrantes, sem var unnin í samstarfi við bassaleikarann og tónskáldið Óttar Sæmundsen og svo Château Bjarna Frímanns Bjarnasonar. Platan Dolores Del Ríó, ánöfnuð Local Product, kom svo út 2019 og sjötta verkið kom í fyrra. Just a Closer Walk With Thee er bæði kvikmynd (gerð í samstarfi við Matthew Barney) og plata með The Emotional Carpenters sem er eitt nafnanna sem Stephan notar þegar hann skapar tónlist (hin þrælmagnaða Serengeti, 2015, er líka undir þeim hatti). Reykjavik Record Shop hefur nú tekið höndum saman með Radio Bongo (útgáfuarmi President Bongo) og í dag koma út tvær plötur. Sjöunda platan er merkt dúettinum Uwaga en sú áttunda er tónlist við Á annan veg, kvikmynd Hafsteins Gunnars Árnasonar, sem President Bongo samdi eftir að myndin hafði komið út (mjög forsetalegt!).
Frekari upplýsingar um allt þetta efni og tónlistardæmi má finna á radiobongo.fm. Mig langar nefnilega til að nota restina af plássinu undir tónlistarlega greiningu, fara í saumana á Eros, plötu Uwaga (sem fjallar um ástarsamband Erosar og Psyche). Það eru margir sem koma að tónlistinni en Uwaga er að stofni til President Bongo og Þorsteinn Einarsson, Steini í Hjálmum. Ýmis kunnugleg nöfn má sjá í upplýsingarunu plötunnar, Daníel Friðrik Böðvarsson og Aaron Roche koma m.a. að upptökum ásamt Bongo sem er annars í mörgum hlutverkum hérna. Hann, Daníel og Þorsteinn semja sjálfa tónlistina en ég læt vera að telja upp hljóðfæraleikara hér. President Bongo er kannski þekktastur fyrir aðkomu að allra handa raftónlist en hann fer létt með að svífa vængjum þöndum um aðra geira, sjá t.d. plöturnar sem upp hafa verið taldar. Uwaga er þó merkilega „eðlileg“ plata í öllu samhengi, hér höfum við lög og kunnuglega rödd Steina þótt ávallt sé stutt í Bongo-snúning. Þannig er upphafslagið sólbökuð stemma í anda Rys Cooders mætti segja en strax á eftir tekur við gáskadrifið lag og allt allt öðruvísi, „Pleasure Thief“. „Discontent Fizzes“ er kannski ágætt dæmi um að hlutirnir geta aldrei verið of eðlilegir í útsendingum Radio Bongo og fjórða og síðasta lagið á hlið A, „Fatal Hearts“, er í framsæknara lagi, naumhyggjuleg „ambient“-stemma með uppbrotum sem fær að hanga í rúmar átta mínútur.
Plötunni er svo snúið við og platan verður í raun æ meira afstrakt. „Mating Display“ er í raun réttu hljóðverk, „Ultimate Union“ er dálaglegt skrítipopp hvar sjálfur Óttarr Proppé kíkir í heimsókn og svo er plötu slitið með „Speed of Illusion“ sem kallast á við upphafið. Skrumskældur eyðimerkurblús með rafkryddi sem er fullkominn endir á ansi ævintýralegri sjö laga yfirreið.
Myndbandsfrumsýning!
Myndband við lagið „Pleasure Thief“ eftir þau Gabríelu Friðriksdóttur og Pierre-Alain Giraud var þá frumsýnt í dag og finna má hlekk að því á samfélagssíðum Reykjavík Record Shop, President Bongo og Radio Bongo og á arnareggert.is.
Hér er hlekkur á myndbandið góða, njótið vel lesendur góðir. Þrýstið á myndina og þá opnast það í nýjum glugga:
Og að lokum, sjálft umslagið:
Deildu!
